D Monika Schreiber-Loch (* 11. Septämber 1941 z Löörech-Duemerge[1] as Monika Loch; † Dezämber 1986) isch e dytschi Dialäktdichteri gsii.
Si isch z Duemerge uf d Wält chuu un au dert ufgwachsen un uf d Schuel gange. Gschafft het si as Verwaltigsaagstellti. Si isch ghyrote gsii mit em Werner Schreiber un het mit ihm zwee Sihn ghaa. Mit ihre Familie het si in ihrem Haimetort gläbt un isch Huusfrau un Mueter gsii. D Schreiber-Loch isch e Schweschter zum Hajo Loch gsii.
Im Johr 1976 het d Schreiber-Loch mitgmacht bim Mundartwettbewärb „aktion junge mundart“, wu dr „Alemannische Gesprächskreis“ im Regierungspräsidium Fryburg veraastaltet het. Si het en Uuszaichnig iberchuu un het ab do as hoffnigsvolli neii Stimm in dr sidbadische Dialäktliteratur gulte. Zwai Johr speter het si ne Uuszaichnig iberchuu bim Theaterwettbewärb vum Alemannische Gesprächskreis. En Uuswahl vu Gedicht un Gschichte het si 1980 im Lohrer Schauenburg-Verlag publiziert.
Ihre Mann het anne 1983 iber si gschribe:
„Sie fing an mit Gedichten über ihre Kinder und befaßte sich immer mehr auch mit allgemein menschlichen Themen. In ihren lyrischen Gedichten schlägt sie überwiegend ernste Töne an, aber immer wieder findet sie auch zu humorvoll-besinnlichen Aussagen. Sowohl in ihrer Poesie als auch in ihrer Prosa kommt sie mit wenigen „verdichteten“ Worten aus und ist doch trotzdem imstande, dem Zuhörer alles zu sagen. In ihren neuesten, -noch unveröffentlichten Gedichten zeigt sie, daß gerade die Mundart fähig ist, Gewichtiges in einer bis an die Grenzen der Sprachlosigkeit verdichteten Sprache auszusagen.“
Im Dezämber 1986 isch d Schreiber-Loch im Alter vu 45 Johr gstorbe. En Uuswahl vu Gedicht un Gschichte us ire Nochloss isch anne 2001 unter em Titel Bi di Muetter - bisch mi Chind uusechuu.