Dr Dirk Baldinger (* 27. Augschte 1971 z Fryburg) isch e ehmolige dytsche Radrännfahrer.
As Amateur isch er fir dr Verain TSV Betzingen gfahre.[1] Anne 1993 isch dr Dirk Baldinger Zweete vu dr Gsamtwärtig vu dr Rhyland-Pfalz-Rundfahrt wore. Im Johr druf isch er dytsche Meister im Stroßeränne vu dr Amateur wore[2] un het dr Giro delle Regioni gwunne.
Anne 1995 isch dr Baldinger Profi wore, isch zerscht fir s Radsportteam Polti un speter fir s Team Telekom un s Team Nürnberger gfahre. 1995 un 1996 isch er bi dr Tour de France gstartet, het aber d Rundfahrt baidi Mol nit chenne bis zum Änd fahre. Sy Uusschyde anne 1995 isch unter dragische Umständ gsii: Am 18. Juli, uf dr 15. Etappe, isch dr Baldinger in e Massesturz verwicklet gsii, wu dr italienisch Radrännfahrer Fabio Casartelli dedli verunglickt isch. Dr Baldinger sälber isch mit eme Beckebruch ins Chrankehuus yygliferet wore. Bi däre Tour het e ai Dag lang s Wyss Trikot fir dr bescht Noowugsfahrer drait.[3] Anne 2002 het er ufghert mit syre aktive Radsportlaufbahn.[4]
Em Radsport isch dr Baldinger verbunde blibe as Erschte Vorsitzer vum Radfahrverain Edelwyss Märdinge 1923.[5] Au het er si in dr Lokalbolitik engaschiert. Anne 2016 het er di sportli Laitig vum UCI Women’s Team Cervélo Bigla ibernuu,[6] wun er anne 2015 scho assistierende Sportlige Laiter gsii isch.[7] 2018 isch er as Sportlige Laiter zue WNT Rotor Pro Cycling gwägslet.[8]
![]() |
Dä Artikel basiert uff ere fräie Übersetzig vu dere Version vum Artikel „Dirk_Baldinger“ vu de dütsche Wikipedia. E Liste vu de Autore un Versione isch do z finde. |