D Charta vo de Veräinte Nazioone isch dr Vertrag, wo me drmit d UNO gründet het.
Si gilt do drmit au wie d Verfassig vo dr UNO. S Dokumänt isch am 26. Juni 1945 vo Verträtter vo füfzg Länder underschribe worde. Am 24. Oktober 1945 isch d Charta in Chraft trätte, wo si vo de meischte Länder und psunders vo alne Mitglider vom Sicherhäitsroot au ratifiziert gsi isch.
D Charta isch für die Länder, wo bi dr UNO sind, e völkerrächtlech verbindleche Vertrag.
Z Düütschland sind die beide Staate BRD und DDR ane 1973 em Vertrag byträtte, d Schwiiz, wo d Vorlöiferorganisazioon vo dr UNO, dr Völkerpund, dihei gsi isch, erscht ane 2002.
D Charta vo de Veräinte Nazioone het en Präamble und nüünzää Kapitel.
D Präamble seit, d Gmeinschaft vo de Völker well drfüür luege, ass es kei Chrieg me gäbi und dass me de algemeine Möntscherächt uf dr ganze Wält nocheläbi.
I de Kapitel vo dr Charta stoot, wie d UNO organisiert isch, was d Gäneralversamlig und dr Sicherhäitsroot mache, wie d Länder i dr Wältwirtschaft selle zämeschaffe und wie dr Internazional Grichtshoof funkzioniert.