Der Carl Albert Loosli (* 4. April 1877 z Schüpfe; † 22. Mei 1959 z Bümpliz), o bekannt als der Philosoph vo Bümpliz, isch e Schwyzer Outor u Journalist gsy.
Der Loosli isch es unehelichs Chind vo der Sophie Emma gsy, ere Heimarbeiterin, und emnen Italiäner mit Nachname Bonnacio (Vornamen unbekannt). Bis 12i het er by’re Pflegmueter gwont. Dernah isch er bis zu syre Volljährigkeit i verschidnigen Astalten ygwise gsy.
Är het nie e Lehr abgschlosse, het’s aber gschafft, outodidaktisch zum Journalismus z cho, u 1893 het er als Reporter z Paris gschaffet. Ab 1904 het er z Bümpliz gläbt.
Näbem Roman Die Schattmattbauern (1932) het der Loosli o Dialäkt-Gedicht gschribe, u zwar i Ämmetaler Bärndütsch, byspilswys Mys Dörfli (1910). We’s i dene Wärch vor Thematik här o um d Bärner Landschaft geit, so chöü si doch nid als Heimatliteratur im ängere Sinn gälte, wil der Loosli ganz bewusst druf het gluegt, das es ke sentimentali Literatur isch worde.
1912 het er zu de Gründigsmitglider vom schwyzerische Schrifstellerverein ghört u isch der erst Präsident worde. Är isch mit em Dialäktoutor Emanuel Friedli befründet gsy.
Der Loosli isch o Kunstkritiker gsy u het sech intensiv mit em Ferdinand Hodler befasst, byspilswys mit ere vierbändige Biografie (1921–24). 1908 isch er Zentralsekretär vo der Gsellschaft vo Schwyzer Maler gsy.
Sys Läbe lang isch er öpper Unapassts ’blibe. I sym Wärch het er geng wider Usgränzigen agchlagt u Disziplinierge vo Ussesyter. So het är byspilswys d Undersuechigshaft agchlagt oder ds Astaltwäse, u het sech für’nes modärns Jugendstraaffrächt ygsetzt.
Är het sech geng wider mit politische Frage beschäftiget. So het er sech byspilswys scho vor 1914 gäge Grabe zwüsche der Dütschschwyz u der Romandie ygsetzt, in ere Zyt, wo sech der Konflikt zwüsche Dütschland u Frankrych uf d Schwyz het übertreit. Das Engagement het em ir Dütschschwyz vil Findschaft ’bracht, dergäge das me’nen ir Romandie het gschetzt.
Der Loosli het sech o gägen Antisemitismus grichtet, byspilswys mit em Ufsatz Die schlimmen Juden! (1927). Dört het er e vollständigi Glychberächtigung für d Jude gforderet, für das si sech der Bevölkerigsmehrheit assimilieri. Me het em drufabe vorgworffe, das bedüti en Uflösig vom Judetum. 1930 het er du ire Serie vo Artikle Die Juden und wir syni Position gänderet u gseit, es göng em nid umne vollständigi Assimilation, sondern umnen Apassig[1].